Noite de San Juan

Hoxe é a noite meiga, noite de celebración en gran parte do país. Nós, aquí en Galicia vivímola, ó meu entender, de maneira particular polas nosas raíces Celtas.

Eu participarei na noite meiga de Flores, oxalá nos xuntemos un bo grupo de personaxes e podamos facer que cada ano vaia a máis este día, pois é dos máis enxebres e tradicionais se poden celebrar.

Boa noite de San Xoán e coidado cos trasgos e coas meigas¡¡¡¡

Pégovos o esconxuro:

Mouchos, coruxas, sapos e bruxas.

Demos, trasnos e diaños,

espritos das neboadas veigas.

Corvos, píntigas e meigas,

feitizos das manciñeiras.

Podres cañotas furadas,

fogar dos vermes e alimañas.

Lume das Santas Compañas,

mal de ollo, negros meigallos,

cheiro dos mortos, tronos e raios.

Oubeo do can, pregón da morte;

fuciño do sátiro e pe do coello.

Pecadora lingua da mala muller

casada cun home vello.

Averno de Satán e Belcebú,

lume dos cadáveres ardentes,

corpos mutilados dos indecentes,

peidos dos infernais cus,

muxido da mar embravescida.

Barriga inútil da muller solteira,

falar dos gatos que andan á xaneira,

guedella porca da cabra mal parida.

Con este fol levantarei as chamas

deste lume que asemella ao do Inferno,

e fuxirán as bruxas a cabalo das súas escobas,

índose bañar na praia das areas gordas.

¡Oíde, oíde! os ruxidos que dan

as que non poden deixar de queimarse

no augardente quedando así purificadas.

E cando este brebaxe baixe polas nosas gorxas,

quedaremos libres dos males da nosa ialma

e de todo embruxamento.

Forzas do ar, terra, mar e lume,

a vós fago esta chamada:

si é verdade que tendes máis poder que a humana xente,

eiquí e agora, facede cos espritos dos amigos que están fóra,

participen con nós desta queimada.